Këngëtarja e njohur, Mariza Ikonomi është ndër personazhet më të pëlqyer për muzikën prej vitesh. Ndryshe nga herët e tjera, ajo ka dhënë një intervistë për ‘Diagnozë’ me Freskida Milotin në lidhje me shëndetin dhe marrëdhënien që ka me mjekësinë. Askush nuk e dinte, por një prej ëndrrave të saj kur ka qenë fëmijë ishte të bëhej doktoreshë pasi adhuronte gjithcka rreth mjekësisë. “Unë mbaj mend kur kam qenë e vogël, mamaja ime ka patur një profesion laborante. Mbaj mend që shpesh herë shkoja në spital tek ajo dhe mrekullohesha tek mikroskopi. Shpesh herë e merrja si lojë por më bënte kaq përshtypje gjithcka, në momentin kur vija syrin, mënyrën se si zvogëlohej, zmadhohej. Unë e merrja si lojë por ishte një moment që me zor e prisja, kur shkoja në spital, kur shkoja tek mamaja. Më pëlqejnë përparëset e bardha, më pëlqenin pacientët. Gjithmonë e kam pasur ëndërr, aq më tepër ne fëmijët: Gjithmonë do bëhem doktoreshë kur të rritem. Kjo ka qenë një ndër ëndrrat e mia. Bëja këto recetat, sa fletore kam harxhuar, këto emrat mbiemrat,” – tha Mariza. Këngëtarja tregoi se është e vetmja gjë për të cilën shqetësohet më shumë se për muzikën prandaj bën kontrolle të vazhdueshme.