Në një ceremoni të veçantë, u promovua libri me titull “PROF. DR. BESNIK JUCJA, ASET I ÇMUAR I FARMACEUTIKËS SHQIPTARE”, një monografi e shkruar nga Çerkin Bytyçi, Ledjan Malaj dhe Zehadin Gashi, kushtuar jetës dhe veprës së këtij personaliteti të shquar. Ky botim erdhi në kuadër të 80-vjetorit të lindjes së Prof. Dr. Besnik Jucjas dhe përbën një pasqyrë të plotë të kontributit të tij akademik, shkencor dhe njerëzor. Në aktivitetin promovues morën pjesë akademikë, farmacistë, kolegë dhe miq të Prof. Jucjas.
Redaktori i librit, Shefajet Berisha, në fjalën e tij vuri theksin te rëndësia e këtij botimi dhe nderimi i figurës së profesorit. Ai shpjegoi se monografia është e ndarë në tri kapituj, duke përshkruar jetën profesionale, karrierën shkencore dhe ndikimin që Prof. Jucja ka pasur te brezat e rinj, përmes impresioneve të kolegëve dhe ish-studentëve.
Prof. Ledjan Malaj, bashkautor i librit, shprehu kënaqësinë për realizimin e kësaj monografie dhe vlerësimin maksimal për kontributin e profesor Jucjas në fushën e farmacisë. 
Ndërkohë, Presidenti i Urdhrit të Farmacistëve të Shqipërisë, z. Defrim Goma, evidentoi rolin kyç të Prof. Jucjas në ngritjen e këtij institucioni dhe në zhvillimin e profesionit të farmacistit në Shqipëri. Ai i dorëzoi Prof. Jucjas mirënjohjeje në shenjë vlerësimi për veprimtarinë e tij të gjatë dhe të suksesshme.
Prof. Dr. Suela Këlliçi, Zv/Rektore e Universitetit të Mjekësisë Tiranë, solli në vëmendje përvojën e saj si studente e profesor Jucjas, duke kujtuar leksionet e veçanta të toksikologjisë që ai zhvillonte me një ndërthurje unike të teorisë dhe praktikës, përmes përvojës së tij në Institutin e Mjekësisë Ligjore. Ajo nënvizoi gjithashtu kontributin e profesorit në mbështetjen e pedagogëve të rinj dhe formalizimin e kujtesës institucionale të arsimit farmaceutik.
Në këtë aktivitet ndau vlerësimin dhe mirënjohjen e saj edhe Diana Toma, Ish Presidentja e Urdhrit të Farmacistëve të Shqipërisë, njëherësh ish studentja e Prof. Jucjas.
Monografia e publikuar për Prof. Dr. Besnik Jucja thekson rrugëtimin e tij të suksesshëm, i cili nisi që në fëmijëri, i udhëhequr nga një dëshirë e zjarrtë për shkollim dhe nga mbështetja e fortë e familjes. Pas përfundimit me rezultate të shkëlqyera të shkollimit në gjimnazin “Qemal Stafa” në Tiranë, ai vazhdoi studimet e larta dhe ndërtoi një karrierë të shquar akademike, duke dhënë një kontribut të çmuar në arsimin e lartë në Shqipëri, Kosovë dhe Maqedoni. Prof. Jucja është i njohur për përkushtimin e tij në mësimdhënie dhe për mbështetjen ndaj studentëve, shumë prej të cilëve janë sot specialistë të suksesshëm e pjesë e stafit akademik në universitete të ndryshme. Kontributi i tij në zhvillimin e programeve pasuniversitare dhe përmirësimin e arsimit farmaceutik ka lënë gjurmë të pashlyeshme në formimin e gjeneratave të reja të farmacistëve dhe studiuesve. Ky botim, realizuar nga Instituti për Hulumtim dhe Zhvillim Farmaceutik Prizren dhe Akademia e Farmacisë “Eureka”, Tiranë, Kjo monografi është një shprehje e mirënjohjes për vlerat shumëdimensionale të Prof. Dr. Besnik Jucjas dhe për përkushtimin e tij të palodhshëm në shkencë dhe arsim.
Gazetare: Freskida Miloti
