Disa ditë më parë, u zhvillua Takimi Shkencor Ndërkombëtar i rrjetit EURESTOP (CA21145), në bashkëpunim me COST Action dhe me mbështetjen e AKKSHI, nën kujdesin e Universitetit të Mjekësisë, Tiranë.
Ky aktivitet mblodhi 50 pjesëmarrës nga rreth 35 institucione kërkimore ndërkombëtare, të cilët ndanë njohuritë dhe përvojat e tyre në fushën e mjekësisë dhe shkencave mjekësore.
Ky organizim forcon bashkëpunimin ndërkombëtar dhe promovimin e kërkimit shkencor që ishin në qendër të diskutimeve. 
Në fjalën e tij përshëndetëse, Rektori i Universitetit të Mjekësisë, Tiranë, Prof. Dr. Xheladin Draçini theksoi rëndësinë e bashkëpunimit ndërkombëtar në përballimin e sfidave globale shëndetësore dhe vlerësoi kontributin e çdo pjesëmarrësi në përparimin e shkencës dhe inovacionit në mjekësi.
Prof. Dr. Xheladin u shpreh: “Fokusi i këtij takimi, diagnostikimi dhe trajtimi i infeksioneve bakteriale antibiotiko rezistente, mbetet një nga prioritetet më urgjente në mjekësinë moderne, duke kërkuar përpjekje të përbashkëta, rigor shkencor dhe bashkëpunim të fortë ndërkombëtar. Universiteti i Mjekësisë, Tiranë, si institucioni udhëheqës në fushën e edukimit mjekësor dhe kërkimit shkencor në Shqipëri, është krenar të mikpresë këtë veprimtari që bashkon ekspertë të shquar, kërkues shkencorë dhe profesionistë nga e gjithë Evropa.”
Zv. Rektorja e Universitetit të Mjekësisë, Tiranë Prof. Dr. Suela Këlliçi u shpreh: “Është një mundësi e shkëlqyer për pjesëmarrësit që të informohen mbi avancimet e fundit në fushën e antimikrobikëve dhe rezistencës ndaj antibiotikëve, zhvillimet e reja, qasjet e trajtimit, kuptimin e thellë të mekanizmave të rezistencës antimikrobike, si dhe për të mësuar për përparimet e tjera në fushën e barnave të reja.”
Prof. Dr. Najada Çomo e cilësoi këtë takim shumë të rëndësishëm me nivel të lartë nga ana shkencore, e inicuar nga Universiteti i Mjekësisë, Tiranë me gjithë aktorët e tij dhe e quajti një vlerë të shtuar dhe një nga detyrat e mëdha për të bërë gjithçka për të përmirësuar pjesën e antibiotikorezistencës.
Prof. Asoc. Entela Haloci që koordinoj këtë takim shkencor shprehet se si departament i farmacisë shpallën thirrjen ta mirëprisnim takimin shkencor në Tiranë, i cili prezantoi strukturat e reja, mekanizmat e rinj me të cilën mund të luftojmë rezistencën bakteriale.
Përgatiti: Freskida Miloti
